Psa 28 | MMX | STEP | O Leeme Silok, nenu Lentupe rak, na nia a ro ke ram! Una ronga lanteng tarak! Dola u noxo ronga ia, nenia anaba lok ngan nedi diba si uto xopok at lemenemen at labarongan.

Psalms 28

Lisingising Ti Loklok Tooro.

1 O Leeme Silok, nenu Lentupe rak, na nia a ro ke ram! Una ronga lanteng tarak! Dola u noxo ronga ia, nenia anaba lok ngan nedi diba si uto xopok at lemenemen at labarongan. 2 Una ronga ia at loxonaleng nia anang teng saparav u ri loklok tooro, la at loxonaleng ana xip aurut lukngak ti loogu laplavang taram i xaala aleng. 3 Nemen gat uta lii lumumuat tarak at loxonaleng u vaase asi limixin kakapmek, la eburu minedi dik lok libilinga, nedi limixin levelinga atnedi ik sixit nunuan, ketla lodoxoma atdi i umsu mi loklok kakapmek.

4 Una lox asongot nedi mumu leveloklok kakapmek atnedi eburu mi lempanga bilinga digara lok pam i. Una lox asongot nedi mumu xa leveloklok atnedi, la una raba bok nedi mi luunun i epovo at loklok atdi. 5 Kopmen dina ven kisip levempanga Leeme Silok gara lok pam i, kopla at levempanga neni ga rudum li i. Kuren la ni naba lox asongot di la naba sele utut kepe axap tino di.

6 Leemi asu ri Leeme Silok, atla ni ira ronga ka vam lanteng tarak ti loklok tooro. 7 Leeme Silok i kok nunuan ia, la i lok ngan lavatban tia. Labalak it kis saga ren, neni im taba ia mi loklok tooro, la ik lox amomo box ia. A tong avukat tin mi livikpixan momo.

8 Leeme Silok i kok nunuan limixin teren la neni i lok ngan lavatban tidi, la ik lox asepsu mo loorong ni ga soxolik ka i. 9 Leeme Silok, una lox asepsu limixin taram, la una lox anarong nedi limixin mokmokso ram; una nemen ngan laradi loklok tatao sipsip tinedi, la mo loklok tatao ram noxo xap.